LADISLAUS III CUBITALIS

 

Corpore parvus eram, cubito vix altior uno,

Sed tamen in parvo corpore magnus eram.

Non ego Prussorumque Bohemorumque cruorem

Iactabo cladem nec, Gedimine, tuam.

Fortunam vici, cum qua mihi bella fuerunt,

Ut Niger e terris triste volarat iter.

Ter cecidi regno; per te, Rhamnusia, semper

Post lapsum erexi maius ad arma caput.

Corde viris opus est magno, non corpore; magnum

Qui stravit Goliam, nonne pusillus erat?

Ingentem parvus Polyphemum vicit Ulysses;

Sed tamen ille hominem, tam grave numen ego.