LESCO VI NIGER

 

Quanta locustarum, quo nos haec scripsimus anno,

Appulit in nostros agmina ventus agros,

Agmina tanta ferunt in nos venisse Getarum

Sub Nigro et primum congeminasse malum.

Iis cessit solis, alio qui semper in hoste,

Cum quocumque iniit proelia, victor erat.

Arma Ruthenorum ductore superba Leone

Et magna exigua contudit ille manu.

Obtrivit quoties Lithuanum et Iazygas? (Hoc iam

Interiit nostro fiinditus ense genus).

Multa in Christicolas nil laudum habitura fuerunt

Bella, lacessitus sed quia vicit, habent.