LESCO TERTIUS

 

Quam fuerit belli cupidus, quam Martis amicus

Iste, vel hoc signo discere quisque potest.

Cum sub eo patriae pax arma quieta teneret,

Bellandi fieret nullaque causa domi,

Impatiens oti Graios contra atque Latinos

Pannonibus toties auxiliaris erat.

Viginti genitor varia de matre nothorum;

Infamat quantum tanta libido virum!

Saepe licet magni post multa tropaea legantur

Et Cypriae studiis incubuisse duces.

Quod si defendi exemplo non possit Achillis

Lesco et Alexandri, Mars quoque moechus erat.