XII PALATINI ITERUM

 

Ad bis sex iterum recidit gens nostra tyrannos,

Immemor o quanti tam cito facta mali!

Tunc nos calcabant Moravi, tunc Pannones, omnis

Denique, Lechidis quisquis iniquus erat.

Mutua pro reges miscebant proelia, tamquam

Esset ab externo non satis hoste mali.

Plebs iterum damnat sua vota et flagitat unum,

Oppressis tutam qui ferat ultor opem.

Quos pelagi fluctus vidisti agitantibus Euris

Instabili huc illuc mox levitate rapi,

Vidisti vulgus, vidisti grandia vulgi

Consilia, in votis propositoque fidem!


CARMINA